Hadeeth Cards
Da'wa cards that highlight great meanings from the noble prophetic hadiths in a simple style and attractive display that helps the Muslim to have a deeper understanding of his religion in an easy way
All
အိဗ်နုအဗ္ဗာစ်(ရဿွိယလ္လာဟုအန်ဟုမာ)က ဆင့်ပြန်ခဲ့သည်။ မုရှ်ရိက်အချို့သည် လူသတ်မှုကို အမြောက်အများကျူးလွန်ခဲ့ကြသည်။ ဇိနာအမှုကိုလည်း အမြောက်အများကျူးလွန်ခဲ့ကြသည်။ ထို့နောက် ၎င်းတို့သည် တမန်တော် မုဟမ္မဒ်(ဆွလ္လလ္လာဟုအလိုင်းဟိဝစလ္လမ်)ထံလာရောက်၍ အသင်အမိန့်ရှိနေသောအရာနှင့် အသင်ဖိတ်ခေါ်နေသောအရာသည် အလွန်ပင်ကောင်းမွန်ပေသည်။ ကျွန်တော်တို့ ယခင်ကကျူးလွန်ခဲ့သောအပြစ်များအား ပလပ်သွားစေမည့်အရာကို အသင်ပြောပြလျှင် ကောင်းလေစွဟု လျှောက်ထားခဲ့ကြသည်။ ထိုအခါ ဤအာယသ်တော်ကျရောက်လာခဲ့သည်။ (၎င်းပြင် အကြင်သူများပင်။ ထိုသူတို့သည် အလ္လာဟ်အရှင်မြတ်နှင့်(တွဲဖက်၍)အခြားကိုးကွယ်ရာ တစ်စုံတစ်ရာကိုမျှ ဟစ်ခေါ်တသ(ကိုးကွယ်ဆည်းကပ်)ကြသည်မဟုတ်ပေ။ ၎င်းပြင် ထိုသူများသည် အလ္လာဟ်အရှင်မြတ်က ‘ဟရာမ်’ ဟူ၍ တားမြစ်ထားတော်မူသော အသက်ဇီဝိန်ကိုလည်း တရားသဖြင့်မှတစ်ပါး သတ်ဖြတ်ခြင်း မပြုကြပေ။ ထိုမှတစ်ပါး ၎င်းတို့သည် ကာမေသုမိစ္ဆာစာရကိုလည်း ကျူးလွန်းကြသည်မဟုတ်ပေ။) ကုရ်အာန် (၂၅:၆၈) ၎င်းနောက် ဤအာယသ်တော်လည်း ကျရောက်လာခဲ့သည်။ ((အို-နဗီတမန်တော်) အသင်သည်(ငါအရှင်မြတ်၏ကိုယ်စား) ပြောကြားပါလေ။ အို-မိမိတို့ အပေါ်၌ အလွန်အမင်း လွန်ကျူးခဲ့ကြကုန်သော ငါအရှင်မြတ်၏ ကျွန်အပေါင်းတို့၊ အသင်တို့သည် အလ္လာဟ်အရှင်မြတ်၏ ကရုဏာတော်မှ မျှော်လင့်ချက် မကင်းမဲ့ကြကုန်လင့်။) ကုရ်အာန် (၃၉:၅၃)
ဗုခါရီကျမ်းနှင့် မွတ်စ်လင်မ်ကျမ်း။
အိဗ်နုအဗ္ဗာစ်(ရဿွိယလ္လာဟုအန်ဟုမာ)က ပြောပြခဲ့သည်။ မုရှ်ရိက်အချို့သည် လူသတ်မှုနှင့် ‘ဇိနာ’ကာမေသုမိစ္ဆာစာရအမှုကို အမြောက်အမြားကျူးလွန်ခဲ့ကြသည်။ အစ္စလာမ်သာသနာပေါ်ထွန်းလာသောအခါ ၎င်းတို့သည်တမန်တော်မြတ်(ဆွလ္လလ္လာဟုအလိုင်းဟိဝစလ္လမ်)ထံလာရောက်၍ ကိုယ်တော်ဖိတ်ခေါ်နေသည့် အစ္စလာမ်သာသနာတော်သည် အလွန်ပင်ကောင်းမွန်ကြောင်းနှင့် ၎င်းတို့ယခင်ကကျူးလွန်ခဲ့သောအပြစ်များအား ပလပ်သွားစေမည့်အရာကို ကိုယ်တော်ပြောပြလျှင် ကောင်းလေစွဟု မျှော်လင့်ချက်ကြီးစွာဖြင့် လျှောက်ထားခဲ့ကြသည်။ ထိုအခါ ယင်းအာယသ်တော်နှစ်ပါးကျရောက်လာခဲ့သည်။ ထိုအာယသ်တော်၌ အလ္လာဟ်အရှင်မြတ်သည် မိမိ၏ကျေးကျွန်များအပေါ် ကရုဏာထားမှု၊ ခွင့်လွှတ်ချမ်းသာပေးမှု၊ ၎င်းတို့အပေါ်လွယ်ကူစေမှု စသည်တို့ကိုရှင်းပြထားသည်။ ထို့အပြင် ကျေးကျွန်တို့၌ အလွန်ပင်ကြီးမားများပြားလှသည့် အပြစ်အကုသိုလ်များ ရှိနေလျှင်လည်း အရှင်မြတ်သည် ၎င်းတို့၏ သောင်ဗဟ် အမှားဝန်ချတောင်းပန်မှုကိုလက်ခံတော်မူသည်။ ထိုသို့မဟုတ်ပါက ၎င်းတို့သည်မိမိတို့၏ ကုဖ်ရ် သွေဖည်ငြင်းပယ်မှု၊ ဆိုးသွမ်းမှုအပေါ်တွင်သာ ဆက်လက်ရှိနေမည်ဖြစ်ပြီး အစ္စလာမ်သာသနာတော်သို့ ဝင်ရောက်ကြမည်မဟုတ်ပေ။ ဤတွင် အစ္စလာမ်သာသနာတော်သည် အစ္စလာမ်သာသနာကို လက်မခံမီက ကျူးလွန်ခဲ့သော အပြစ်များကို ပယ်ဖျက်ပေးကြောင်းပါရှိသည်။ သို့သော် စည်းကမ်းချက်တစ်ချက်မှာ အစ္စလာမ်သာနာပေါ်၌ပင် ကွယ်လွန်ရမည်ဖြစ်သည်။
အိဗ်နုအုမရ်(ရဿွိယလ္လာဟုအန်ဟုမာ)က ဆင့်ပြန်ခဲ့သည်။ အလ္လာဟ်အရှင်မြတ်၏ ရစူလ်တမန်တော်(ဆွလ္လလ္လာဟုအလိုင်းဟိဝစလ္လမ်)သည် မက္ကဟ်မြို့ကို အောင်နိုင်သောနေ့တွင် လူတို့အားခွသ်ဗဟ်မိန့်ခွန်း ပြောကြားတော်မူခဲ့သည်။ ကိုယ်တော်က အမိန့်ရှိသည်မှာ အို - လူသားအပေါင်းတို့ မုချဧကန်အလ္လာဟ်အရှင်မြတ်သည် အမိုက်ခေတ်၏ မာန်မာနထောင်လွှားမှုနှင့် ၎င်းခေတ်၏ဘိုးဘေးတို့ဖြင့် ဂုဏ်တုဂုဏ်ပြိုင်ပြုခြင်းတို့အား အသင်တို့ထံမှဖယ်ရှားတော်မူလိုက်လေပြီ။ သို့ဖြစ်ပေရာ လူသည်နှစ်မျိုးသာရှိသည်။ ကောင်းမြတ်သောအကျင့်သီလရှိပြီး အလ္လာဟ်အရှင်မြတ်အား ကြောက်ရွံ့ရိုသေအမိန့်နာခံသူနှင့် အလ္လာဟ်အရှင်မြတ်၏အမိန့်ကိုဖီဆန်သော နဖူးစာဆိုးသည့်သေးသိမ်သူတို့ဖြစ်သည်။ လူသားအားလုံးသည် အာဒမ်(အလိုင်းဟိစ္စလာမ်)၏ သားမြေးများပင်ဖြစ်ကြသည်။ အလ္လာဟ်အရှင်မြတ်သည် အာဒမ်(အလိုင်းဟိစ္စလာမ်)အား မြေကြီးဖြင့် ဖန်ဆင်းတော်မူခဲ့သည်။ အလ္လာဟ်အရှင်မြတ်မိန့်တော်မူသည်မှာ (အို - လူခပ်သိမ်းတို့၊ ဧကန်မလွဲ ငါအရှင်မြတ်သည် အသင်တို့အား ယောက်ျားတစ်ယောက်၊ မိန်းမ တစ်ယောက်မှ (စတင်)ဖန်ဆင်းတော်မူခဲ့၏။ ထို့ပြင် ငါအရှင်မြတ်သည် အသင်တို့အချင်းချင်း တစ်ဦးကိုတစ်ဦး ခွဲခြားသိမြင်မှတ်မိကြအံ့သောငှာ၊ လူမျိုးစုအသီးသီး မျိုးနွယ်အသွယ်သွယ် ပြုလုပ်တော်မူခဲ့၏။ ဧကန်စင်စစ် အသင်တို့အနက် (အလ္လာဟ်အရှင်မြတ်အား) အကြောက်ရွံ့ဆုံး၊ အပြစ်များမှ အများဆုံး ကြဉ်ရှောင်သောသူသည်သာလျှင် အလ္လာဟ်အရှင်မြတ် အထံတော်၌အမြင့်မြတ်ဆုံးသောသူဖြစ်၏။ စင်စစ်တစ်မူကား အလ္လာဟ်အရှင်မြတ်သည် အသိတော်မူဆုံး၊ အကြားတော်မူဆုံးအရှင် ဖြစ်တော်မူပေသတည်း။) စူရဟ် အလ်ဟုဂျုရာသ်-(၄၉:၁၃)
သိရ်မိဇီကျမ်း။
တမန်တော်မြတ်(ဆွလ္လလ္လာဟုအလိုင်းဟိဝစလ္လမ်)သည် မက္ကဟ်မြို့ကိုအောင်နိုင်သောနေ့တွင် လူတို့အား ခွသ်ဗဟ် မိန့်ခွန်းပြောကြားတော်မူခဲ့သည်။ ကိုယ်တော်က အမိန့်ရှိသည်မှာ အို-လူသားအပေါင်းတို့ မုချဧကန်အလ္လာဟ်အရှင်မြတ်သည် အမိုက်ခေတ်၏မာန်မာနထောင်လွှားမှုနှင့် ၎င်းခေတ်၏ ဘိုးဘေးတို့ဖြင့်ဂုဏ်တုဂုဏ်ပြိုင်ပြုခြင်းတို့အား အသင်တို့ထံမှဖယ်ရှားတော်မူလိုက်လေပြီ။ သို့ဖြစ်ပေရာ လူသည်နှစ်မျိုးသာရှိသည်။ ပထမတစ်မျိုးမှာ အလ္လာဟ်အရှင်မြတ်ထံတော်ပါးတွင်ကောင်းမြတ်သောအကျင့်သီလရှိပြီး အလ္လာဟ်အရှင်မြတ်အား ကြောက်ရွံ့ရိုသေအမိန့်နာခံသောမုအ်မင်န်ဖြစ်သည်။ ၎င်းသည် မိမိလူမျိုးထဲတွင် ဂုဏ်သရေရှိသူ မဖြစ်လျှင်လည်း ၎င်းအားချစ်ခင်ကာ ဂုဏ်ပေးလေးစားရမည်။ ဒုတိယတစ်မျိုးမှာ အလ္လာဟ်အရှင်မြတ်၏အမိန့်ကိုဖီဆန်သော နဖူးစာဆိုးသည့် သေးသိမ်သူဖြစ်သည်။၎င်းသည် မိမိ၏မိသားစုတွင် ဂုဏ်သိက္ခာရှိပြီး အဆင့်အတန်းမြင့်မားသူဖြစ်နေလျှင်လည်း ထိုသို့သောသူအပေါ် အမုန်းထားကာ ရှောင်ရှားရမည်။ လူသားအားလုံးသည် အာဒမ်(အလိုင်ဟိစ္စလာမ်)၏ သားမြေးများပင်ဖြစ်ကြသည်။ အလ္လာဟ်အရှင်မြတ်သည် အာဒမ်(အလိုင်ဟိစ္စလာမ်)အားမြေကြီးဖြင့် ဖန်ဆင်းတော်မူခဲ့သည်။ သို့ဖြစ်၍ မိမိ၏ဇစ်မြစ်က မြေကြီးဖြစ်နေသူအနေဖြင့် မာန်မာနမထောင်လွှားသင့်ပေ။ ထို့နောက် ကိုယ်တော်မြတ်(ဆွလ္လလ္လာဟုအလိုင်းဟိဝစလ္လမ်)သည် အထက်ပါအာယသ်တော်အားရွတ်ဖတ်တော်မူခဲ့သည်။ ၎င်းအာယသ်တော်က လူသားများအကြား တစ်ဦးကတစ်ဦးထက်သာပိုမြင့်မြတ်မှုအား တိုင်းတာသည့် စံနှုန်းအစစ်အမှန်မှာ သက္ကဝါတရားရှိခြင်းပင်ဖြစ်ကြောင်း ညွှန်ပြထားသည်။ သက္ကဝါတရားရှိသူသည်သာလျှင် အလ္လာဟ်အရှင်မြတ်ထံတော်ပါး၌ အမြင့်မြတ်ဆုံးသူဖြစ်သည်။
ဇုဗိုင်ရ်ဗင်န်အောင်ဝ်ဝါးမ် (ရဿွိယလ္လာဟုအန်ဟု)က ဆင့်ပြန်ပြောကြားခဲ့သည်။ (ထို့နောက် အသင်တို့သည် စည်းစိမ်များနှင့်စပ်လျဉ်း၍ မုချအမှန် စစ်ဆေးမေးမြန်းခြင်းကို ခံကြရမည် ဖြစ်သတည်း။) ကုရ်အာန် (၁၀၂:၈) ဟူသောအာယသ်တော်ကျရောက်လာသောအခါ ဇုဗိုင်ရ်(ရဿွိယလ္လာဟုအန်ဟု)က လျှောက်ထားသည်မှာ အိုအလ္လာဟ်အရှင်မြတ်၏ရစူလ်တမန်တော် ကျွန်တော်မျိုးတို့သည် မည်သည့်စည်းစိမ်နှင့်ပတ်သက်၍မေးမြန်းခြင်းခံရမည်နည်း။ ကျွန်ုပ်တို့ထံတွင် အမဲရောင်နှစ်ခုဖြစ်သော စွန်ပလွံသီးနှင့်ရေ စသည့်နှစ်မျိုးသာလျှင် ရှိပေသည်။ ကိုယ်တော်ကမိန့်တော်မူသည်မှာ မကြာမီ ၎င်းနှင့်စပ်လျဉ်း၍ မေးမြန်းခြင်းခံရလိမ့်မည်။
သိရ်မိဇီကျမ်း။
(ထို့နောက် အသင်တို့သည် စည်းစိမ်များနှင့်စပ်လျဉ်း၍ မုချအမှန် စစ်ဆေးမေးမြန်းခြင်းကို ခံကြရမည် ဖြစ်သတည်း။) ကုရ်အာန် (၁၀၂:၈) အာယသ်တော်၏ဆိုလိုရင်းမှာ အလ္လာဟ်အရှင်မြတ်သည် အသင်တို့အား ချီးမြင့်ထားသည့် ကျန်းမာခြင်း၊ ငြိမ်းချမ်းစွာရှိခြင်း၊ ရိုဇီရိက္ခာရရှိခြင်းစသည်တို့အပြင် အခြားနိအ်မသ် စည်းစိမ်များနှင့်စပ်လျဉ်း၍ ကျေးဇူးသိတတ်ခဲ့ပါသလားဟု မကြာမီ အသင်တို့မေးမြန်းခြင်းခံရလိမ့်မည်ဖြစ်သည်။ အထက်ပါ အာယသ်တော်ကျရောက်လာသောအခါ ဇုဗိုင်ရ်ဗင်န်အောင်ဝ်ဝါးမ်(ရဿွိယလ္လာဟုအန်ဟု)က မေးမြန်းသည်မှာ အို - အလ္လာဟ်အရှင်မြတ်၏ ရစူလ်တမန်တော် ကျွန်ုပ်တို့သည် မည်သည့်စည်းစိမ်နှင့်ပတ်သက်၍ မေးမြန်းခြင်းခံရမည်နည်း။ ကျွန်ုပ်တို့ထံတွင် အလွန်တန်ဖိုးနည်းသည့်အတွက် မေးမြန်းစရာပင်မလိုအပ်သော နိအ်မသ်နှစ်ခုသာရှိပေသည်။ ၎င်းတို့မှာ ‘အတ်စ်ဝဒါန်’ဟုခေါ်သော စွန်ပလွံသီးနှင့် ရေဖြစ်သည်။ စွန်ပလွံသီးသည် အနက်ရောင်ဖြစ်ပြီး မဒီနဟ်မြို့တော်၏စွန်ပလွံသီးအများစုမှာ အနက်ရောင်ပင်ဖြစ်သည်။ ဤတွင် ရေကိုပါထည့်၍ဖော်ပြရခြင်းမှာ အရဗ်တို့သည် ဒွန်တွဲနေသောအရာနှစ်ခုကို စုပေါင်း၍ ထိုနှစ်မျိုးစလုံးကို နာမည်တစ်မျိုးတည်းဖြင့်သာ ခေါ်ဝေါ်လေ့ရှိကြသည်။ ထို့နောက် အလ္လာဟ်အရှင်မြတ်၏ရစူလ်တမန်တော်(ဆွလ္လလ္လာဟုအလိုင်းဟိဝစလ္လမ်)က ဇုဗိုင်ရ်အားအမိန့်ရှိသည်မှာ ‘အို - ဇုဗိုင်ရ် မကြာမီ၎င်းနှင့်စပ်လျဉ်း၍ မေးမြန်းခြင်းခံရလိမ့်မည်။’ ဤသည် အဓိပ္ပါယ်နှစ်မျိုးဖြစ်နိုင်သည်။ ပထမတစ်မျိုးမှာ အသင်တို့ မကြာမီရရှိမည့်စည်းစိမ်နှင့်ပတ်သက်၍ မေးမြန်းခံရမည်ဟု ဆိုလိုခြင်းဖြစ်သည်။ ဒုတိယတစ်မျိုးမှာ အသင်တို့ ယခုရှိနေသည့်အခြေအနေနှင့် ပတ်သက်၍ မေးမြန်းခံရခြင်းဖြစ်သည်။ ထိုစည်းစိမ်နှစ်မျိုးစလုံးသည် အလ္လာဟ်အရှင်မြတ်ချီးမြှင့်သည့် စည်းစိမ်တော်များအနက် ကြီးကျယ်လှသောစည်းစိမ်တော်ဖြစ်သည်။
